Internet cafe sa siyudad monitoron

Gi-awhag sa konseho sa siyudad sa Sugbo ang kapolisan nga monitoron matag karon ug unya ang tanang mga accredited internet café dinhi sa dakbayan aron hingpit nga masumpo ang mga law-ay'ng pasundayag niini nga ilang gitanyag ngadto sa mga subscriber.

Si Konsehal Edgardo Labella moduso atol sa sesyon sa konseho karong hapon og resulosyon alang ning maong katuyo-an human nakadawat kini og report sa grabeng pagsiaw sa pornograpiya karon sa internet.

Nabalaka ang konsehal nga kun pasagdan ug dili masumpo ang maong pornograpiya karon sa internet nga gitawag og "Hentai" usa ka Japanese term sa abnormality makahatag unya kini og mas dako pang problema ilabi na niadtong mga minor de edad nga subscriber.

Ang hepe sa Cebu City Police Office (CCPO) Sr/ Supt. Patrocinio Comendador maoy gitahasan diha sa resolusyon sa konsehal nga maoy mangulo alang sa hugtanong pagpatuman sa ordinansa sa siyudad nga nag-ban niadtong mga pornograpiya sa internet café dinhi sa dakbayan.