3 kawata'g manok nadakpan

Tulo ka mga tawo nga kawatan og manok igtatari nadakpan sa kapolisan sa Argao ug nakuhaan og duha ka kalibre sa armas sa miaging adlaw didto sa Suba, Poblacion sa maong lungsod.

Unang nadakpan ang duha samtang ang ikatulo nasikop sa gihimong checkpoint sa kapolisan pagka kaadlawon.

Walay suwerte ang tulo ka mga kawatan kay ang una nilang gikawat nga manok igtatari gipanag-iya og usa ka polis.

Ang mga nadakpan giila sa kapolisan nga si Arnel Delgado Abelgas, 40, ulitawo ug nagpuyo sa Duljo, Fatima, Romeo Plantar Benetiz, 33, minyo, lumad nga taga Inuburan, Naga ug kasamtangan nagpuyo sa Duljo Fatima ug Ernesto Gerbise Morales, 28, ulitawo ug residente sa Inayawan ning dakbayan.

Segun sa report sa kapolisan, si Abelgas ug Benetiz naaktuhan ni PO2 Eleazer Canada nga mikuha sa iyang manok igtatari duol sa iyang panimalay sa miaging udto.

Daling nanawag si PO2 Canada ngadto kang Sr. Insp. Crisanto Doque aron mangayog tabang. Si Doque uban nila ni SPO1 Carlito Amrillo, PO2 Jeoville Bacarisas ug PO1 Eduardo Semilla ug ilang naabtan ang duha nga gidakop na ni Eleazer.

Sa dihang girikisa sa mga polis ang travelling bag sa duha nakuhaan si Delgado og hunting knife ug laing duha ka manok igtatari ug si Benetiz nakuha sa posisyon ang usa ka .38 rebolber nga dunay 4 ka buhing bala.

Sa gihimong imbestigasyon sa kapolisan, si Benetiz mitug-an nga may kauban sila nga nag-operate sa Bogo ug Talaga sa samang lungsod.

Daling mihimo og pakisusi ang grupo ni Sr. Insp. Doque ug nasuta pinaagi sa mga opisyales sa barangay labot sa presenya ni Morales.

Si Morales maoy gitudlo nga mikawat sa tulo ka hiniktan sa magsuong Roel ug Melchor Gelbolingo apan nakaikyas human nakadagan sa ngitngit sa dihang gisuwayan unta og gukod.

Pagka alas 5 sa kaadlawon, si Morales paingon na sa dakbayan sa Sugbo apan nasikop sulod sa gisakyang bus de pasaheroan sa dihang ang kapolisan nihimo og checkpoint.

Nakuha gikan kaniya ang tulo ka manok igtatari, usa ka .38 rebolber nga may lima ka buhing bala ug kutsilyo nga gibutang ilawom sa travelling bag diin gitipon og sulod sa manok.

Kagahapong adlawa, gidala sa dakbayan ni Doque aron ipasaka ang kaso batok ni Morales ug Benetiz ang kasong Comelec gun ban samtang si Abelgas mag-atubang og kasong pagpangawat didto sa Argao.