Si Supt. Pablo Labra II, hepe sa Criminal Investigation and Intelligence Branch nagkanayon nga dunay mga polis nga ipakatap sa maong mga dapit aron masigurong luwas sa mga tawong mangadto sa maong mga lugar.
Mipahimangno usab si Labra niadtong mga lalaking mangabang og mga babayeng nagbaligya sa ilang unod sa pagmatngon tungod kay ang uban kanila posibleng sakop sa grupong 'Tumba-saging" kun kadtong mga babayeng ang tuyo di lang ang bayad sa serbisyong pakighilawas kundili pangawat usab.
Matud pang Labra daghan na silang nadawat nga report kabahin niini nga may kalambigitan ang mga babayeng mugbo og lupad diha sa kilid-kilid.
Dugang pa niini mipahimangno usab si Labra sa managhigugmaay sa dili paghimo og malaw-ay nga binuhatan sa mga parke ug ubang romantikong dapit nga makaeskandalo na sa ubang mga tawo tungod kay mahimo silang dakpon.
Lakip sa bantayan mao ang mga dapit kan-anan diin sagad nga adtuon sa mga adunahang mga pamilya nga moselebrar sa Valentine's Day pinaagi sa usa ka panihapon uban sa ilang mga kabanay.
Dugang pahibalo ni Labra ngadto sa mga polis nga dunay trabaho sa dili pagbiya sa ilang mga pwesto aron lang makig-date sa ilang mga hinigugma tungod kay posible silang mapasakaan og kasong administratiba.