UNO-Cebu gilusad

Pormal nang gilusad ang provincial chapter sa United Opposition (UNO) dinhi sa Sugbo kagahapong adlawa diin si kanhi Kongresista Crisologo "Sol" Abines ang kanhi kongresista sa segundo distrito maoy gitudlong provincial chapter chairman niini.

Atol sa press conference nga gipatawag ni Abines didto sa Baseline restaurant kagahapon sa udto gipresentar niini ngadto sa iyang mga supporter gikan sa nagkalainlaing mga lider sa oposisyon sa kalungsoran sa segundo distrito ang iyang appointment nga pirmado gikan ni Makati Mayor Jejomar Binay, ang presidente sa UNO.

Gilusad sa oposisyon dinhi sa Sugbo ang UNO duha ka adlaw human pormal nga gilusad ang One Cebu Party nila ni Gobernador Gwendolyn Garcia ug Bise Gobernador Gregorio Sanchez niadtong Sabado.

Nunot niini, gipahibalo usab ni Abines ang iyang pagkandidato og balik pagka- kongresista sa segundo distrito sa umaabot eleksiyon karong Mayo batok kang kanhi Gobernador Pablo Garcia nga mipahibalo nga molansar pagka-kongresista sa maong distrito.

Wala hinuon makapresentar og mga pangalan sa oposisyon nga maoy ilang klaro nang ibangga batok ni Gobernador Garcia ug Sanchez apan gipasalig ni Abines nga sigurado sila nga makabutang gyud og lig-ong kontra batok nila ni Garcia ug Sanchez.

Gipasalig ni Abines nga human sa duha ngadto sa tulo ka semana pormal na nilang ipahibalo ang mga kandidato nila gikan sa pagka-gobernador, pagka-board member ug ngadto na sa pagka-mayor, bise mayor ug konsehal sa tibuok probinsya sa Sugbu.

Apil sa gitug-an ni Abines nga gikonsiderar karon sa oposisyon nga mokandidato pagka- gobernador ug bise gobernador naggikan sa pamilyang Osmeña, Yapha, Martinez,Durano,Gullas ug pamilyang Quisumbing.

Si Abines linudhan kini sa kasal ni kanhi Gobernador Garcia nga maoy iyang ikakontra sa pagka kongresista sa umaabot piniliay.