2 ka pusher nasikop sa buy-bust sa PDEA-7; 1 naka-eskapo

Duha ka drug pusher nadakpan usa niini anaa sa listahan sa kapolisan nga tigpayuhot og ginadiling drugas samtang usa ang nakaeskapo sa gihimong buy -bust operation sa kapolisan sa Sitio Limogmog, Gairan, Bogo sa miaging gabii.

Gipangulohan ni Chief Insp. Arturo Pacifico inabagan sa Philippine Drug Enforcement Agency (PDEA)7 nga miresulta sa pagkasikop ni Ched Artem Desavilla alyas "Dondon" 26 ulitawo, residente sa samang dapit ug Gino Bagon, 22, ulitawo ug nagpuyo sa Santo Rosario sa samang lungsod.

Si SPO3 Edgardo Terol nga nahinabi sa Banat News miingon ang mga suspetsado nadakpan human ang usa ka sibilyan nga gihimong poseur buyer misinyas sa mga polis human makapalit og shabu sa panimalay ni Desavilla hinungdan nga gihimo dayon ang buy-bust operation.

Ang kapolisan nakakuha og siyam ka putos sa gidudahang shabu ug laing lima ka dagkong putos nga ang sulod shabu.

Usa ka gatos ang gigamit nga marked money ug ang 3510 cellphone nga gigamit sa maong operasyon.

Samtang ang nakaikyas giila ni SPO3 Terol nailhan lang sa pangalan nga Popoy Amores ug nadagit ang lima ka tag usa ka gatos nga ghimong marked money human makabantay sa mga polis.

Matud ni Terol ang operasyon gihimo usa ka semana nga surveillance human makadawat sila og report kabahin sa pagpamaligya og ginadiling drugas ni Desavilla ug mga kauban.

Dugang pang SPO3 Terol nga si Desavilla ikawalo sa listahan nga namaligya og shabu ug ilado na kaayo sa mga manggamitay og shabu.

Ang duha ka dinakpan anaa gitanggong sulod sa detention cell samtang gihikay na ang tukmang kaso nga ipasaka batok kanila.