Duha gipamusil

Samdan sa dughan ang usa ka caretaker og tindahan diha sa dalan N.Bacalso sa South Expressway human kini pusila sa grupo sa mga batan-ong gituuhang nag-triping kagahapon sa kaadlawon.

Ang biktima giilang si JP Carecare,19, residente sa maong dapit kinsa kasamtangang nagbantay sa tindahan sa iyang uyoan nianang tungura.

Grupo sa batan-ong gituuhang mga miyembro og gang ang gitumbok nga miparegla sa biktima.

Matud pa niini sa Homicide Section wala siya makamatikod nga ang grupong milabay diha sa atubangan sa tindahan dunay nagdala og armas apan diha nalang kini nahibulong dihang kalit nga dunay usa ang mibunot ug dayong pusil kaniya.

Si Carecare naigo diha sa walang bahin sa dughan ug daling gidala sa Cebu City Medical Center samtang ang mga suspek daling nakaikyas palayo sa dapit.

Samtang laing bahin, usa ka construction worker ang napusilan og shotgun sa iyang bitiis human aksidente mibuto ang shotgun sa gwardiya sa construction site nga iyang gitrabahoan.

Ang biktima giilang si Efren Quijano,42, lumad nga taga Takdog, Carcar ug stay-in nga mason sa gihimong edipisyo diha sa dalan Devera sa North Reclamation Area.

Matud pa sa biktima ngadto sa Homicide Section kasamtangan siyang naglingkod sa iyang higdaanan diha sa second floor sa gihimong edipisyo dihang nakit-an niyang miroving ang gwardiyang si Roland Humuad, sakop sa Glemco Security Agency.

Ang gwardiya giingong kalit nga mikasa sa iyang shotgun apan mibuto usab kini ug naigo si Quijano sa iyang bitiis. Ang suspek human matinong nakaigo siya og tawo giingong daling miikyas.

Ang biktima dali usab nga gidala sa tambalanan ug luwas na ang kahimtang.