Makabotar gihapon bisag way Comelec ID

Makabotar atol sa eleksiyon karong Mayo ang tanang rehistrado bisan walay gigunitan nga identification card (ID) sa Commission on Elections.

Kini ang katin-awan nga giluwatan ni Comelec-7 legal officer, Atty. Lionel Marco Castillano, atol sa Kapihan sa PIA kagahapon.

Gipasabot ni Castillano nga ang Voter's ID gikinahanglan lang aron pagseguro nga ang tawo nga ningbotar mao gyud ang anaa sa listahan sa mga rehistradong botante.

Matud pa ni Castillano nga kon magduda ang sakop sa Board of Election Inspectors sa tawo, mangita gyud kono kini sa ID.

Nunot niini giawhag ni Castillano kadtong walay ID nga gikan sa Comelec nga magdala og laing valid ID nga ikapakita sa higayun nga pangitaan gyud sa mga sakop sa BEI og ID ang usa ka botante.

Nasayran nga ang Comelec nipasiugda og ID capturing pinaagi sa computer apan dili pa tanang rehistradong botante ang nakakupot niini.