CICC mokita na rong Hunyo

Ipahigayon sa Cebu International Convention Center ang kadaghanan sa mga dagkung kalihukan sa Cebu Business Month karong Hunyo nga pasiugdahan sa Cebu Chamber of Commerce and Industry.

Kini bisan og ang grand opening salvo sa CBM 2007 nga nagdala sa tema nga, "Cebu Let's Go," himoon sa Mayo 5 sa Ayala Center Cebu.

Unang ipahigayon sa CICC sa Hunyo 14 ug 15 mao ang Cebu ASEAN Tourism Congress ug Presentation of Winning Tourism Business Plans sa Hunyo 15 ug Media Forum for Tourism sa Hunyo 18.

Ang Cebu ICT 2007 International Conference ipahigayun sa Hunyo 26 hangtud 27 sa Shangri-La's Mactan apan ang Cebu ICT 2007 International Exhibition ipahigayun sa CICC sa Hunyo 26 hangtud 28 samtang ang Presentation of Winning ICT Business Plans ipahigayun sa Hunyo 27 sa CICC.

Ang Grand Chamber Awards nga maoy motapos sa kalihukan sa CBM 2007 sa Hunyo 28 ang ipahigayun gihapon sa CICC.

Sugod karong Pebrero 20 magsugod na ang mga kalihukan sa CCCI may kalabutan sa pagsaulog sa CBM 2007 sa nagkalainlaing lugar gawas sa CICC.