Caltex Mentor program gilusad

Ang Chevron Philippines Incorporated ug ang Rotary Club Cebu milusad ug "Caltex Mentor Program" alang sa mga tinun-an sa Lo-oc Elementary School diin adunay 947 ka mga tinun-an ug 19 ka mga maestra sa maong tunghaan sa miaging buntag sa siyudad sa Lapu-lapu.

Tumong sa programa mao ang pagpalambo sa abilidad sa tinun-an mahitungod sa pagbasa niini ilabi na kadtong nagtungha sa pang-publiko nga eskwelahan.

Dul-an sa 46 ang miboluntaryo nga mahimong mentor ngadto sa mga tinun-an sa maong tunghaan ug gani mipaubos man kini sila sa usa ka orientation.

Ang Caltex Mentor Program molanat ngadto sa upat ka adlaw ug dili mominus ngadto sa P200,000 ang ilang nagasto sa maong programa.

Matud pa ni Mark Andrew Quebral ang manager sa Chevron Philippines, Incorporated sentro sa maong programa mao kadtong anaa sa lowest section sa grade 1 ngadto na sa grade 2 diin kasagaran sa maong tinun-an dili makamao mobasa. Midugang si Quebral nga una pa kini nga nahitabo dinhi sa lalawigan sa Sugbo diin ang Chevron Philippines mipahigayon ug usa ka programa alang gyud sa mga tinun-an sa publiko nga eskwelahan.

Ubay-ubay na usab nga lugar ang nakapahimulos sa maong programa nga gilusad sa maong kompanya ug kini mao ang Metro Manila, Pangasinan, Batangas, Iloilo City ug apil na niini ang lalawigan sa Sugbo.