Padung untang 'manuyop' sa Alaska; 6 gipanakop

Unom ka mga tawo ang gidakop sa mga sakop sa Criminal Investigation and Intelligence Branch human maaktuhing padulong na manuyop sulod sa usa ka gamay'ng kubol diha sa sitio Puntod, Alaska-Mambaling ning dakbayan niadtong milabay'ng gabii.

Ang grupo nila ni PO3 Beezalel Olmedo,PO2 Larry Coderos ug PO1 Ryan Heyrosa kasamtangang nagpahigayon og saturation drive sa maong dapit batok bisan unsang matang sa kriminalidad.

Ang mga polis gikatahong naagi diha sa usa ka payag nga dunay mga tawong kadudahan ang lihok ug sa ilang pagsusi giingong akto diay silang manuyop og shabu.

Ang mga suspek giilang sila si Rodel Gonzaga, 32, residente sa maong lugar; Ruel Camingaw, 21; Teresito Baraga, 19; Michael Layasan, 18; Rodulfo Lopez, 31 pulos mga taga Pinamungajan ug Joel Friolo, 32 nga taga Jagobiao, dakbayan sa Mandaue .

Ang kapolisan nakakuha og mga shabu drug paraphernalia nga gamiton sa pagsuyop gikan sa posesyon sa unom hinungdan sa ilang pagkaaresto.

Ang mao gihapong grupo sa CIIB nianang pagkaalas tres sa kaadlawon kagahapon misulod sa Ermita ug nakadakop sa usa ka Archie Enecio, 44 anyos, ug residente sa maong barangay human kini makuhai og mga gamit usab sa pagsuyop.

Ang pito ka mga dinakpan gikatakdang pasakaan karong adlawa og kasong paglapas sa Akta Republika 9165.