Suspek sa frustrated murder sa Pasko sikop sa checkpoint

Usa ka lalaking suspek sa kasong frustrated murder nga nahitabo niadtong Pasko nadakpan sa mga sakop sa Criminal Investigation and Intelligence Branch atol sa checkpoint kagahapon sa udto tungod sa paghupot og gidudahang shabu ug kutsilyo.

Ang nadakpan giilang si Richard Rafols,28, alyas Bakang, taga dalan Sikatuna sa Riverside, Lorega-San Miguel tungod sa nakuhang duha ka paketeng may sulod nga drogas, usa ka syringe, usa ka wala nay sulod nga ampule sa nubain ug usa ka kutsilyo.

Ang CIIB checkpoint gilangkuban nila ni PO1 Antonio Asoy, Jr.; PO1 Larymar Laquinon ug PO1 Roque Deguit ug pinanguluhan ni PO3 Gerard Cue nga diha gipahimutang sa may New Imus Road sa barangay Day-as ning dakbayan.

Ang suspek luwan sa usa ka PUJ nga biyaheng Talamban dihang gipara sa mga polis ug gipakanaog ang mga pasaherong lalaki giingong kalit nga gihapak ni Rafols sa iyang itom nga sudlanan og antyohos ang dughan ni PO1 Laquinon dayong tukmod sa polis ug midagan.

Ning tungura nahitabo ang ginukdanay hangtud nga naabtan si Rafols sa laing grupo sa mga polis diha sa unahan, atol sa pagrekisa nigimaw ang kutsilyo diha sa bulsa ni Rafols hinungdan sa iyang pagkasikop.

Sa pagsusi sa itom nga sudlanan sa antyohos nakita ang mga gidudahang drogas.

Si Rafols maoy suspek sa pagpusil kang Oliver Ovaldi,28, kinsa taga Puntod, Mambaling niadtong Disyembre 24 sa gabii diha sa sitio Plastikan sa Duljo-Fatima, si Ovaldi luwas na sa peligro apan nakaeskapo niadtong tungura si Rafols.

Kasamtangan pa karong nag-ungot ang kasong frustrated murder sa korte. Dugang kaso usab ang ipasaka sa CIIB karong adlawa batok kang Rafols.