Kini kun tumanon ang Resolusyon Numero 7707 nga giluwatan sa Commission on Elections niadtong Agosto 30, 2006 nga naghan-ay sa mga kalihukan may kalabutan sa ipahigayun nga piniliay karong Mayo 14, 2007.
Base sa maong Resolusyon, Septiyembre 16, 2006 ra ang katapusang adlaw sa pagsang-at og petisyon alang sa pagrehistro sa usa ka politikanhong partido, kwalisyon sa mga partido, ug sektoral nga grupo nga mosalmot sa party-list system.
Ang maong resolusyon nagmando usab sa party convention sa pagpili ug pagnominar sa mga opisyal nga kandidato alang sa tanang posisyon sugod sa Nobiyembre 30, 2006.
Gikatakda nga iparehistro pa sa Comelec ang One Cebu Party sama sa Alayon sa Kalamboan ug Kalinaw ni Kongresista Eduardo Gullas ug Barug Alang sa Kauswagan ug Demokrasya ni kanhi kongresista ug Danao City Mayor Ramonito Durano III.
Sila si Gullas ug Durano nipadayag sa ilang suporta sa kandidatura ni Garcia ug ni Bise-Gob. Gregorio Sanchez Jr. sa umaabot eleksiyon.
Apan si Gullas niklaro nga magpabilin sila sa tagsatagsa nila ka partido ug mobutang sila og kaugalingong kandidato ilabi na sa unang distrito.