Pederasyon sa mga tanod sa Lapu' ug M'daue nireklamo

Ang pederasyon sa mga hepe sa barangay tanod sa dakbayan sa Lapu-Lapu ug dakbayan sa Mandaue nagkahiusa alang sa ilang pagpadayag og reaksiyon sa kalambigitan sa pagsul-ob og uniporme nga nagdala og litra nga "Police".

Ang maong reaksiyon ilang gihimo human usab si Bise Mayor Michael Rama sa dakbayan sa Sugbo miawhag sa kapolisan sa pagdakop sa mga barangay tanod nga magsul-ob t-shirts nga may marka nga "Police" o "Barangay Police".

Sa ilang gipirmahang manipesto nga gipadangat sa Banat News niadtong miaging adlaw ilang gihulagway nga dili makiangayon ang pagpadayag ni Bise Mayor Rama ngadto kanila.

Subay sa mao nilang manepesto ilang gipasabot nga lakip man usab sila sa naapektohan taliwala usab sa pagpakahilom sa mga barangay tanod sa dakbayan sa Sugbo.

Giklaro nila sa maong manipesto nga ubos sa Article 152 sa Revised Penal Code nga ang barangay police gi-appoint sa barangay kapitan ang nanumpa usab sa ilang paghupot sa maong katungdanan.

Gipaubos kini sa mga pagbansaybansay alang sa pagpatuman sa kahapsay ug kalinaw sa barangay ug kaabag kini sa mga regular nga mga polis sa pagpanalipod sa kinabuhi ug kabtangan sa katawhan.

Kahinumdoman nga gihimo ang maong pamahayag ni Bise Mayor Rama dihang nahitabo usab ang pagpanulis sa usa ka establisamento sa dakbayan sa Sugbo nga nagsul-ob og polis ang mga tulisan kinsa mipatay pa sa guwardiya nga nagbantay niini.

Apan sa wala pa ang maong insidente mipagawas na og direktiba ang uluhang buhatan sa PNP niadtong Disyembre sa pagdili na sa mga sibilyan sama sa mga barangay tanod nga pasul-obon og sininang may markang "police".

Lakip sa gidili mao ang mga tailoring ug mga printing press nga did-an sa paggamit ug paghimo og mga uniporme sa kapolisan gawas nalang kung sila accredited sa PNP isip opisyal nga tighimo ug tig-imprenta niini.