52 anyos naangol sa saag nga bala sa Danao

Naangol ang usa ka tigulang babaye human maigo sa saag nga bala alas 7 pasado ang takna sa miaging gabii sa barangay Guinacot, dakbayan sa Danao.

Ang biktima mao si Asteria Saladaga, 52 anyos, biyuda ug nagpuyo usab sa maong dapit.

Si SPO1 Jose Relampagos sa Danao Police Station nga gikahinabi sa Banat News miingon nga naglakaw lang ang biktima pauli sa ilang panimalay dihang kalit nga nabati ang lanog nga boto sa armas.

Dugang pa niya nga walay nakamatikod kon kinsa sa maong dapit ang nagpaboto sa armas hangtod namatngonan sa biktima ang kalit nga pagpamanhod sa walang bahin sa iyang bitiis.

Nagtuo siya nga nag-testing sa gibuhat nga armas ang nagpaboto sanglit naila man ang maong dapit sa pagpamuhat og nagkadaiyang kalibre sa armas.

Matud pa ni SPO1 Relampagos nga nagkadugo ang bitiis sa biktima nga gidala sa Danao District Hospital kinsa gibalhin lamang usab sa Vicente Sotto Memorial Medical Center sa dakbayan sa Sugbo.