Police.-Brenda D. Batuto Sakop sa Trihedron nga suspek sa pagpatay og Akrho nadakpan

Nasikop sa kapolisan sa Talisay kagahapon sa buntag ang usa ka giingong sakop sa Trihedron fraternity kinsa usa sa suspetsado sa pagpatay sa usa ka sakop sa Alpha Kappa Rho (Akrho) diha sa Sitio Kilawan Barangay Tanke dakbayan sa Talisay.

Si Bernie Bacallan, 19-anyos, residente sa nahisgutang lugar kinsa gipasakaan og kasong attempted homicide diha sa sala ni Regional Trial Court (RTC) Judge Olegario Sarmiento Jr. sa branch 24 nagtingkagol karon diha sa Talisay city police detention cell.

Dala nila ni Police Inspector Jaime Santillan, polis sa Talisay ang warrant of arrest nga giluwatan ni Sarmiento batok ni Bacallan dihang ila kining gisikop.

Si Bacallan pabayaron og P40 mil para sa iyang temporaryong kagawasan.

Si PO2 Joel Rosales, polis sa Talisay kinsa maoy miimbestigar sa nahisgutang insidente mibutyag kagahapon sa buntag sa Banat News nga si Bacallan usa sa suspetsado sa pagpatay ni Edward Gabriel Bacaltos kinsa gikompirma sa mga polis nga sakop sa Akrho niadtong milabay'ng buwan diin ang insidente nahitabo diha sa Barangay Tabunok.

Kahinumduman nga ang mga polis sa siyudad mikompirma usab nga fraternity war ang motibo sa maong hitabo.

Matud ni Rosales nga napiho nilang sakop sa trihedron si Bacallan tungod sa marka niini sa kumingking ug sa singsingan niining tudlo sa tuong kamot.

Si Rosales midungag nga mopahigayon sila og imbestigahon ni Bacallan.