Mayor sa Daanbantayan gikiha'g pagpamakak diha sa Ombuds

Gipasakaan og kasong perjury ang mayor sa lungsod sa Daanbantayan diha sa buhatan sa Ombudsman for the Visayas tungod sa giingong pagpamakak niini sa gihatag nga pamahayag sa iyang counter-affidavit isip tubag sa kasong kriminal ug administratibang gipasaka batok kaniya.

Ang maong kaso may labot sa gisang-at nga kasong "gross derelection of official duty" nga gipasaka ni Rosanni Luche batok sa mayor niadtong Nobiyembre.

Gipasanginlan ang mayor nga napakyas pagpanalipod sa usa ka luna nga gipanag-iya sa munisipyo nga gitukuran og mga balay sa mga eskwater sa maong lungsod.

Tungod sa gialegar nga kapakyas sa mayor pagpapahawa sa mga eskwater sa maong luna nga gikatakda man untang tukuran sa merkado publiko nawad-an og kahigayunan ang lungsod nga mokita sa abot niini.

Sa counter-affidavit sa mayor penetsahan og Enero 8, kini nagkanayon nga wala siya magpabaya isip mayor tungod kay walay resolusyon gikan sa konseho nga nagtugot kaniya nga ipademolis ang mga residente.

Apan si Luche nangangkon nga namakak ang mayor tungod kay ang konseho dugay na nga mihatag kaniya og pagtugot sa pagpasaka og kasong eviction sa mga eskwater. Ang maong resolusyon nga naghatag og gahum sa mayor matud pang Luche niadto pang Septembre 4,1998 napasar ug gipangamahanan nila ni Konsehal Jovencio Taneo ug Renato Te.

Miinsister usab si Luche nga di mahimong mangangkon ang mayor nga wala siya makahibalo kabahin sa maong resolusyon tungod kay pormal kining gidawat sa buhatan sa mayor ug duna kini tubag suwat nga nagpahibalong nadawat ang maong resolusyon.

Mipasangil si Luche nga maong wala tumana sa mayor ang resolusyon tungod kay supak kini niini ug mas gidapigan pa ni Loot ang mga eskwater ug dili ang munisipyo.

Matud pang Luche nga nakalapas si Loot sa Artikulo 183 sa Revised Penal Code.