2 batan-on dasmaga'g Innova patrol car

Duha ka batan-ong luwan sa usa ka motorsiklo ang milandig sa tambalanan human madasmagi sa Toyota Innova patrol car nga miresponde sa usa ka alarma niadtong milabay'ng gabii.

Ang mga biktima giilang sila si Arge Yaris,17, ug Jofrem Labiaga,17 pulos taga Punay, Aloguinsan ug nagsakay sa usa ka Suzuki nga motorsiklong may plakang IG-1917.

Samtang ang nakadasmag kanila mao si Inspector Rex Campus, sa Mobile Patrol Group kinsa maoy nagmaneho sa Innova nga may plakang SHN-896 pag-abot diha sa eskina sa dalan Osmeña Blvd. ug dalan M.Yap sa Capitol Site.

Matud pang SPO1 Nelson Jaime sa pakighinabi sa Banat News padulong si Campus sa Guadalupe aron pagtubag sa usa ka trouble alarm ug migamit pa kini og siren ingon man blinkers.

Apan pag-abot sa gikahitaboan ang duha gikatahong wala mosunod sa traffic light nga stop signal ug milahos gihapon sila hinungdan sa pagkaigo kanila sa maong patrol car. Tungod sa kakusog sa impact nalagpot ang duha sa konkretong dalan.

Ang patrol car diretso nalahos sa may poste maayong pagkaguba sa atubangang bahin sa patrol car ug nabuak ang samin niini sa atubangan, hinuon wala maunsa ang sakay niini.

Ang duha ka mga batan-on daling gidala sa Cebu City Medical Center tungod sa mga kadaut sa lawas, diin si Labiaga gikatahong naa sa talandugon nga kahimtang.