Pamanhig sa opisyal sa BOC gikondenar

Si Gobernador Gwendolyn Garcia hugot nga mikondenar sa pagpang-ambush patay sa usa ka opisyal sa Bureau of Customs sa milabay'ng gabii sa dakbayan sa Lapu-Lapu.

Atol sa unang gabii sa haya ni Jason Alcantara, assistant chief sa Customs PEZA Clearance Office (CPCO) si Garcia miduaw ni Alcantara gumikan kay suod kini nga higala sa iyang anak nga si Paulo ug kauban kini sa ilang kaduwa sa Airsoft Group kun ASG nga magduwaan bisan asang dapita sa lalawigan sa Sugbo.

Si Garcia hugot usab nga migakos sa inahan, asawa ug duha ka anak ni Jason atol sa ilang panagkita ug misaad kini nga mohimo og lakang sa dinaliang pagsulbad sa kaso ni Alcantara.

Gumikan niini, iyang giawhag si Lapu-Lapu Police chief Supt. Louie Oppus nga mohimo og subsob nga imbestigasyon sa kasong pagpamanhig ni Alcantara aron kahatagan og hustisya ang pamilya niini.



Subay niini, si Supt. Oppus nga nahinabi sa Banat News mipasabot nga hangtod karon duha lamang ka anggulo ang ilang gisubay sa pagpatay kang Alcantara ug kini mao ang anggulo sa kalambigitan sa iyang trabaho sa customs ug personal nga motibo sa pagpatay niini.

Matud pa ni Oppus nga kuyog sa asawa ni Alcantara ug ni Atty. Rey Vergado, hepe sa CPCO ilang gihiling ang drawer sa opisina ni Jason alang sa dugang ebidensiya nga mahipos sa daling kasulbaran sa kaso.

Hinuon mipasalig si Oppus nga ilang himuon ang tanan aron matumbok ang responsable o mastermind sa pagpatay ni Alcantara.

Kahinumduman nga Martes sa gabii sa Sitio Sudtungan, Basak, Lapu-Lapu samtang pauli na kini sa ilang panimalay gibanhigan si Alcantara sa duha ka tawo nga nagluwan og motorsiklo gamit ang kalibre .45 nga gibutangan og silencer.

Gumikan sa samad sa ilok nga bahin maoy gituhoan nga maoy fatal nga igo sa biktima hinungdan sa iyang kamatayon didto sa Mactan Doctor's Hospital.