Drayber sa DOH-7 naugbok patay

Naugbok ang ulo ug namatay ang usa ka 65 anyos nga drayber sa Department of Health 7 sa ilang buhatan sa Osmeña Compound kagahapon sa kaadlawon human kini mahagbong gikan sa terasa.

Ang biktima giilang si Germelio Bulala, minyo ug lumad nga taga Guiwanon, Barili apan kasamtangang stay-in sa maong buhatan.

Si Bulala napalgan nalang nga naghapa diha sa tennis court duol sa kongkretong paril nga ang ibabaw ang terasa diin usab siya maghigdaan.

Gituohang kasamtangang nag-ehersisyo si Bulala diha sa terasa nianang tungora dihang nahagbong kini ngadto sa ubos.

Matud pa sa mga kaubanan niini sa trabaho sa mga tigbalita nga naandan na ni Bulala ang maong gimbuhaton matag adlaw una pa magsugod sa iyang trabaho isip drayber.

Si Paul Ybañez, 60, ug maoy disbursing officer sa DOH7 nga diha usab magpuyo sa maong buhatan mitug-an nga ang terasa maoy katulganan sa biktima inig ka human sa ilang trabaho.

Sumala pa sa usa ka report sa lokal nga sibyaanan, si Bulala niadto pang milabay'ng Enero13 ning tuiga miretiro sa serbisyo apan mihangyo kini og extension nga unom pa ka buwan aron mahustong 15 ka tuig ang pag-alagad niya sa gobiyerno.

Si Edwin Ynot, 33, sakop sa Assault Security Agency nga maoy nag-roving palibot sa compound maoy nakakita sa patay'ng lawas sa biktima nga dunay dakong samad sa ulo.

Matud pang SPO3 Alex Dacua sa pakighinabi sa Banat News nga posibleng naglingkod-lingkod ang biktima sa kilid sa terasa nga nagpatong ang tiil sa iyang higdaanan ug nawad-an og balanse hinungdan sa pagkatagak niini sa ubos nga nag-una ang ulo ug adto naigo sa kilid sa semento.

Niadtong tungura dunay pito ka mga gwardiya nga nagbantay sa maong compound ug walay nakitang laing tawong nakasulod, wala say nakitang timailhang gidagmalan ang biktima sanglit ang samad niini mao ra ang sa iyang ulo, ug nahibilin ang usa ka tsinelas niini sa terasa samtang ang usa gisuot pa sa biktima.