CH migasto P1.5M sa mga esposa sa Asean

Usa ka milyon og tunga ang nagasto sa nasudnong kagamhanan ug laing sobra sa tunga sa milyon ka pesos ang nagasto sa kagamhanan sa siyudad sa Sugbo sa gihimong pagsuroysuroy sa mga kapikas sa mga presidente nga delegado sa milabay'ng 12th Asean Summit dinhi sa Sugbo niadtong Enero 12 hangtod sa 15.

Si Cebu City First Lady Margot Osmeña nga maoy chairman sa spouses committee dinhi sa dakbayan nipagawas sa kinatibuk-ang breakdown kon nagastu sa maong pagsuroy suroy sa mga asawa sa presidente sa Asean Countries atol sa maong summit.

Ang National Organizing Committee (NOC) migahin og P1,559,195 alang sa tulo ka dagkong kalihukan dinhi sa dakbayan nga mao ang pag-host ni First Gentleman Mike Arroyo og panihapon diha sa Malacañang sa Sugbo, ang gipahigayong unveiling sa Friendship Garden sa Talamban ug ang paglaag-laag.

Apan sa maong kantidad mikabat lang sa P1,525,020 ang nagasto niini gikan sa pagkaon sa mga performers, working committee, technical staff ug uban pa nga mikabat og P173,420.

Miabot usab og P230,000 ang nagasto sa Cebu Organizing Committee alang sa pagpangabang og mga kagamitan ingon man sa mga dekorasyon nga miabot og P186,000 ug P33,600 ang nagasto alang sa pagkaon og softdrinks sa mga kapikas sa Asean leaders.

Ang gahin alang sa musical and cultural presentation maoy labing dako og pahat nga migasto og P902,000.

Gipasabot ni Margot nga bisan og wala nila mahurot ang P1.5 milyones nga gahin sa (NOC) apan wala nila makobra ang sobra sa maong gasto tungod kay direkta ang pagbayad niini ngadto sa mga supplier.

Samtang sa P596,750 nga gahin sa siyudad mikabat lang og P513,300 ang nagasto sa gitaplan nga ubang gastuhan.

Matud ni Margot nakadawat pa usab sila og P880,000 nga donasyon nga salapi gikan sa mga pribadong sektor dinhi sa dakbayan wala pay labot sa 9 mil ka mga pandesal og 5 mil ka mga bottled water nga maoy gipakaon sa matag practice sa mga performers.