Tomas miangkon siyay mabasol sa mga tulis

Inay basulon ang kapolisan ilabi na ang bag-ong hepe sa Cebu City Police Office (CCPO) Sr. Supt. Patrocinio Comendador, gi-angkon hinuon ni Mayor Tomas Osmeña ang tanang mga kasaypanan tungod sa lain na usab nga pagpanulis nga nahitabo dinhi sa dakbayan sa Anchor Savings Bank niadtong miaging adlaw sa dalan Archbishop Reyes Avenue.

Ang maong pagpanulis mao nay ikalima nga mga dagkong pagpanulis nga nahitabo dinhi sa dakbayan karun lang tuiga.

Gipasabot sa mayor nga inay basulon ang kapolisan mas labaw pa siyang maoy mabasol niining tanang panghitabo gumikan kay isip maoy mayor sa siyudad responsibilidad niya ang pagpatunhay sa kahusay ug kalinaw ug pagpanalipod sa interes sa mga Sugboanon ug mga negosyante.

Apan sentro sa gibasol sa mayor sa maong panghitabo mao ang dili epektibo nga pagkagamit karon sa Modern Alarm Response System (MARS) gumikan usab sa pagka walay kooperasyon sa mga tagdumala sa bangko.

Natahap ang mayor nga tungod kay insured ang maong mga bangko hinungdan nga dili kaayo kini agresibo pagkooperar pagpalig-on sa ilang seguridad ilabi na sa pagbutang og alarm system tungod kay mabayran man kini sa insurance sa higayon nga mabiktima sa pagpanulis.

Nasagmuyo kaayo ang mayor sa sitwasyon karon sa mga bangko dinhi sa dakbayan nga duna lay usa ngadto sa tulo ka mga guwardiya ang nagbantay niini nga unta naghupot man og dakong kantidad nga kwarta ang maong mga bangko sa adlaw-adlaw nila nga operasyon.

Nakahukom si Osmeña nga isentro na lang ngadto sa mga retailer kun gagmay'ng mga negosyante dinhi sa dakbayan ang pagpatuman sa modernong alarm system nga gigastuhan og P2 milyones sa siyudad aron mamonitor dayon sa kapolisan kun dunay motumaw nga pagpanulis.

Apan naglaraw usab ang mayor nga makig-negotiate bisan og usa lang ka bangko dinhi sa dakbayan aron mo-aplay sa modernong alarm system ug aron unya kini makapahimulos ipublikar kini sa siyudad nga maoy labing luwas nga bangko nga depositohan sa Sugbo.