Pang-ambush sa customs man giimbestigar

Padayong nag-imbestigar ang kapolisan sa pagpamanhig sa usa ka opisyal sa Bureau of Customs sa duha ka tawo nga nag-motorsiklo samtang nagmaneho sa iyang kotse sa likuon nga karsada sa Sitio Sudtungan, Basak, Lapu-Lapu sa milabay'ng gabii.

Ang biktima mao si Jason Alcantara, 28, minyo ug nagpuyo sa BF Better Living Subdivision dili halayo sa dapit nga nahitaboan ug maoy assistant chief sa Customs-PEZA Clearing Office (CPCO) nga nahimutang sa MEPZ-1.

Sumala pa sa mga nakasaksi nga duha ka tawo nga nagluwan og motorsiklo ang mibanhig kang Alcantara sa maong dapit nga wala gani magtaptap ug magsul-ob og helmet ang mga mamumuno.

Upat ka samad pinusilan ang nahiaguman ni Alcantara sa iyang walang ilok, sa liog ug duha ka samad sa walang bukton agi sa usa ka kalibre .45 nga gigamit sa mga suspetsado.

Nasayran sa imbestigasyon ni PO3 William Homoc sa Homicide Section sa Lapu-Lapu nga si Alcantara gikan sa iyang opisina sa MEPZ 1 mideretso kini sa Mandaue City Sports Complex alang sa ilang basketball tournament sa Bureau of Customs diin usa kini sa mga players.

Mga 8:30 sa milabay'ng gabii sa dihang mipauli na kini sa ilang panimalay luwan sa iyang Honda Civic gisundan kini sa duha ka tawo nga nag-motorsiklo pag-abot sa Basak Mercado ug mi-overtake pa ang motor.

Mga 300 metros ang gilay-on sa dili pa ang panimalay ni Alcantara, ang nag-angkas sa motor maoy mibunot sa iyang armas nga gibutangan og silencer mipusil ni Alcantara upat ka higayon hinungdan sa iyang pagkalandig sa Mactan Doctor's Hospital. Ang mamumuno misibat paingong Suba Masulog lahos sa Cordova.

Bisan pa sa pagsuway og luwas sa kinabuhi ni Alcantara sa mga doktor , gideklarar kini nga patay mga alas 11:45 sa gabii.

Pipila ka mga residente nga nakakita sa maong panghitabo misaysay sa Banat News nga human sa unang buto sa armas si Alcantara misuway pa kini og pakusog sa iyang sakyanan apan sa dihang usa ka bata ang milabang mibalik kini og pa-minor sa sakyanan ug didto na gitiwasan ang biktima sa pagpusil habig sa bintana sa lingkuranan sa drayber.

Base sa dugang imbestigasyon sa kapolisan sa Lapu-Lapu usa sa posibleng motibo nga ilang gilantaw sa maong panghitabo mao ang kalambigitan sa iyang trabaho sa customs.

Si Alcantara maoy usa sa approving officer sa mga papeles sa importasyon alang sa mga kompaniya sa MEPZ ug sa Special Economic Zone sa dili pa makagawas sa Cebu International Port.

Si Alcantara maoy ulahing opisyal nga gibanhigan patay dinhi sa Cebu human niadtong tuig 2004 diin si anhing Cebu Customs Deputy Collector for Operation Wewe Lao gibanhigan patay sa dalan Osmeña Boulevard, mga 20 metros ang gilay-on sa Camp Sotero Cabahug diin mag-opisina ang Police Regional Office - 7.

Samtang si Cebu Customs District Collector Ricardo Belmonte hugot nga mikundenar sa pagpatay ni Alcantara ug nanawagan kini sa kapolisan nga himuon ang tukmang imbestigasyon aron kahatagan og hustisya ang kamatayon niini.

Giklaro ni Belmonte nga mipadala pa siya og text sa grupo ni Alcantara tungod sa pagkadaog niini sa dula nga basketball, apan walay pipila ka gutlo nakadawat siya og text nga gipusil si Alcantara ug pagkasunod text, patay na kini.