Trabahante sa mangga palgang patay

Usa ka trabahante sa usa ka kompaniya sa mangga napalgang patay sulod sa iyang lawak didto sa Sitio San Miguel, Pusok, Lapu-Lapu sa milabay'ng udto.

Si Eric Tuquib, 25, ulitawo, lumad sa Lamac, lungsod sa Pinamungahan ug kasamtangan nga nag-abang og lawak sa Sitio San Miguel, Pusok, Lapu-Lapu. usa ka trabahante sa the Trust Manpower Services Corp., tiggama sa dried mangoes sa Mandaue.

Base sa imbestigasyon ni SPO2 Rolito Jumao-as, sa Homicide Section sa Lapu-Lapu, usa ka Ismael Franconas nga kaubang boarder ni Tuquib misaysay nga dako ang iyang kahibulong nga wala na mogawas sa iyang lawak si Tuquib.

Matud pa ni Franconas nga matag buntag sayo mogawas sa iyang lawak si Tuquib alang sa pagsayo og tambong sa trabaho.

Gumikan niini, ilang gitawag si Jesus Bernardo, ang ilang Sitio President aron sa pagsulod sa lawak ni Tuquib ug didto nakita nga wala nay kinabuhi si Tuquib.

Walay nakitang senyales sa 'struggle' o 'foul play' sa patay'ng lawas ni Tuquib nga anaa karon sa lokal nga punerarya alang sa pagpa-autopsy niini.