Nanulis sa Dranix ilhan na

Duna nay grupong gisubay ug nailhan na ang posibleng suspek sa pagpanulis sa Dranix Distributors Incorporated sa dalan Tagunol sa barangay Basak-San Nicolas sumala pa sa kapolisan.

Kini human usa ka kasaligang testigo ang mitug-an sa kapolisan kabahin sa pagplano palang sa grupo kaniadto pa.

Si Supt. Pablo Labra nagkanayon nga ilang gisubay karon nga posibleng ang kanhi mga empleyado ra usab sa maong establisamento ang miplano ug mihimo sa pagpanulis.

Napatay ang usa sa duha ka mga gwardiya sa maong insidente nga giilang si Edgardo Emboledo Sr. niadtong Enero 28, ang mga suspek nagpakaaron ingnong mga polis nga moinspeksyon sa mga gwardiya sa Dranix niadtong tungura.

Nakuha sa grupo ang gibana-banang tunga sa milyon ngadto na sa usa ka milyong salapi gikan sa gi-acetylene nga vault.

Sa gihimong follow -up investigation sa Theft and Robbery Section gikatahong kining maong mga suspek gitaktak kaniadto tungod kay nakit-ang positibo sila sa drogas.

Duna nasad silay kanhi kaso kaniadto sa pagpanulis ug dunay nagpaabot nga warrant of arrest.

Si Labra nagkanayon nga sa pagkakaron "circumstantial statements" palang ang ilang gihuptan ug wala pa makonektar og maayo ang mga ebidensyang nakuha ngadto sa mga tawong ilang gidudahan.

Si Comendador sa iyang bahin miklaro nga wala niya kasab-i ug wala usab siya mawad-i og pagsalig kang Relado tungod kay nakita niining milihok kini sa iyang trabaho.

"Wala man ko moingon nga nawad-an nata og salig because he is still working like a horse," asoy pang Comendador.

Dugang pa niini nga di makaapektar ang pamahayag ni Relado ngadto sa media niadtong milabay'ng semana kabahin sa opinyon niining may kalambigitan ang napatay nga si Emboledo sa hitabo tungod kay usa kini sa ilang mga gisubay nga anggulo.