Bag-ong natawo gilubong sa baybayon

Batang lalaki nga bag-o pa nga natawo nakuykoyan sa gilubngan niini sa baybayon sa Sitio Tacan, Ibo, Lapu-Lapu sa milabay'ng buntag.

Base sa imbestigasyon nga gihimo ni SPO2 Rolito Jumao-as sa Homicide Section sa Lapu-Lapu Police Station nga usa ka Antonia Gantalao, residente sa maong dapit ang nakakaplag sa gilubngan sa bata samtang nanginhas.

Si Gantalao miasoy sa mga imbestigador nga samtang nanuhid kini sa baybayon kay nangita og kinhason, dako ang iyang katingala sa dihang migimaw ang kamot sa bata sa iyang gikuykoy.

Gipahibalo ni Gantalao ang mga residente sa maong lugar ug nagtinabangay sila pag-ugkat sa patay'ng lawas sa bata ug gidala kini sa Lapu-Lapu District Hospital apan gideklarar nga kini patay na nga miabot sa tambalanan.

Nagtuo si Dr. Miñoza nga bag-o pa nga natawo ang bata nga gilubong sa ginikanan niini. Apan dili kini makakonpirmar kun patay na ba kini daan sa wala pa gilubong sa baybayon.

Matud pa ni SPO2 Jumao-as nga posibleng gabii gihimo sa ginikanan ang paglubong sa bata ug wala kini malubong pag-ayo hinungdan nga migawas ang kamot niini samtang sige ang pagbanlas sa tubig dagat.

Matud pa ni Gantalao nga wala silay namatikdan nga dunay tawo nga nagkalot og lungag sa daplin sa baybayon apan nahibulong kini nga dunay gilubong nga batang bag-ong natawo sa maong dapit.

Ang patay'ng lawas sa bata anaa kini sa Rolling Hills Funeral Homes alang sa usa ka awtopsiya aron masayran kun unsa gyud ang gikamatyan sa maong batang lalaki, samtang padayon ang pagsusi sa mga sakop sa Homicide Section kun kinsa nga ginikanan ang nakaako paglubong sa maong bata.