Maayong pagkabuak sa ulo ug pagkahabwa sa utok ug tinai ni Alfredo Vargas, residente sa naasoy'ng lugar.
Si PO2 Joel Rosale polis sa Talisay kinsa maoy miresponde sa nahisgutang insidente miingon nga si Alfredo Vargas wala na makaabot sa tambalanan tungod sa mga naangkon niining samad.
Ang suspetsado giila usab sa mga polis nga si Heroncio Hipolan, 34, nagpuyo usab diha sa maong barangay kinsa daling miikyas human sa insidente ug padayon pang gipangita sa mga polis.
Si Rosales sa pakighinabi niini sa Banat News kagahapon nagkanayon nga dugay na nga dunay personal nga panagbangi ang duha.
Si Hipolan nasuko ni Vargas tungod kay ang mga kanding niini moadto sa iyang uma ug sabsabon ang iyang mga tanom nga kamoteng kahoy.
Si Hipolan mipasangil usab ni Vargas nga mibarang sa iyang kwatro-anyos nga anak hinungdan sa kamatayon niini.
Giatangan ni Hipolan si Vargas dihang pagpaingon kining magtugway sa iyang mga kanding ug sa walay pangutana gipusil ug giluba-luba sa suspetsado ang biktima.
Matud ni Rosales nga nakaangkon og daghang samad dinunggaban si Vargas ug nahabwa ang tinai niini sa walang kilid sa iyang lawas ug tulo ka samad pinusilan usa niini sa iyang ulo.
Maayong pagkabuak sa ulo ni Vargas human kini maigo sa bala sa pusil hinungdan nga nahabwa usab ang utok niini.
Ang mga igsuon ni Hipolan nga si Marcelino ug Elomedio gikatahapan sa mga polis nga dunay kalabutan sa maong hitabo hinungdan nga temporaryo silang gidetiner diha sa detention cell sa Talisay Police Station alang sa imbestigasyon.
Si Rosales midungag nga buhian nila sulod sa 36 oras si Marcelino ug Elomedio kun dili nila mapamatud-an nga duna kini kalambigitan sa hitabo.