Sayo pa pag-ila's hotspot sa Mayo nga eleksiyon

Sayo pa kaayo aron tawgon ang usa ka lugar nga "area of concern" o hot spot ug ikabutang ubos sa Comelec control, matud pa ni Regional Director Rene Buac sa Commission on Election (Comelec-7).

Si Buac kinsa bag-o lang nadestino dinhi sa buhatang rehiyonal sa Comelec nagkanayon nga dili angayang basehan nga tungod kay gibutang ubos sa Comelec control sa milabay'ng election, mahimo usab nga mao gihapoy kahimtang ning lugara karong umaabot nga eleksiyon.

Si Buac nga didto madestino sa lalawigan sa Siquijor sa milabay nga piniliay nagkanayon nga daghang gubot nga lugar kaniadto nga sa pagkakaron malinawon na, busa dili na sila matawag nga hot spot kun area of concern.

Kasagaran usab niining mga dapita kun may ibutang man gyud ubos sa Comelec control, anha na kini mahitabo mga pipila nalang ka adlaw una ang adlaw sa eleksiyon.

Gipasabot ni Buac nga una ikadeklarar ang usa ka lugar nga ubos sa Comelec control kinahanglang sabotan kini sa taga Comelec, Armed Forces of the Philippines (AFP) ug sa Philippine National Police (PNP).

Sa higayon ikabutang ang usa ka lugar ubos sa Comelec control, wa nay gahum ang mga opisyal diha sama sa mayor, gobernador ug bisan si kinsa pa gawas sa Comelec nga paluyohan sa mga sundawo ug sa kapolisan.

Busa alang kang Buac nga bisan wala siya masuhito dinhi sa lalawigan sa Cebu apan nagtuo siya segun sa iyang mga paniid nga layo pa kaayo ang eleksiyon aron tumbokon na ang usa ka lugar nga usa ka area of concern.

Midugang siya nga kon may mga presensiya man sa mga armadong tawo ang usa ka lugar karon, dili kana suliran kay ang balaod naghatag og gahum sa kapolisan pagsikop kanila.