Pusher nakaikyas sa ronda

Napakyas sa pagsikop sa usa ka suspetsadong pusher og shabu ang mga sakop sa Criminal Investigation and Detection Group (CIDG) 7 ug Provincial Drug Enforcement Agency (PDEA) 7 kinsa mipahigayon og pagpangronda kagahapon sa buntag diha sa Zone Sunlot, Barangay Kalawisan dakbayan sa Lapu-Lapu.

Dala sa mga polis nga mipahigayon sa ronda ang search warrant batok ni Jose delos Santos hingkod ang panuigon residente sa maong lugar nga giluwatan ni Regional Trial Court (RTC) Judge Geraldine Faith Econg sa branch 27 sa dakbayan sa Lapu-Lapu.

Apan ang kapolisan napakyas sa pagsikop ni delos Santos tungod kay atol kini nga wala diha sa ilang balay dihang mipahigayon sila og ronda.

Gisikop sa kapolisan ang asawa ni delos Santos nga si Roosever Baguio kinsa giingong naabtan sa mga polis nga nagputos og shabu.

Si Baguio gidetiner karon diha sa CIDG detention cell.

Ang kapolisan nakasakmit og usa ka daku ug medium nga paketeng shabu, napulo ka gagmay'ng pakete sa nahisgutang ginadiling drugas ug shabu paraphernalia gikan sa balay ni delos Santos.

Ang maong pagpangronda gipangulohan ni Police Chief Inspector Fermin Armendarez III sa PDEA.