Amahan sa polis gihagbong sa tulay

Usa ka tigulang lalaki nga amahan sa usa ka polis nga namadlong sa nag-away sa duha ka construction worker gitabangan og kulata ug gihagbong sa taytayan.

Nahitabo kini sa miaging tungang gabii sa Suba-Panas sa Basbas, Lapulapu.

Ang biktima mao si Arturo Canete, 63, minyo ug nagpuyo sa maong dapit ug amahan ni P03 Cerlito Cañete nga sakop sa Special Weapon and Tactic (SWAT) sa kapolisan sa Lapulapu ang gipasanginlang mihagbong ni Cañete sa taytayan sila si Nestor Soronio, 38 anyos, minyo ug Cesar Laurente, 32 anyos, ulitawo ug mga silingan niini.

Si P02 Christian Perez miingon nga ang anak ni Cañete nga sakop sa SWAT nangayog panabang sa kapolisan ug maoy nakasikop nilang Soronio ug Laurente.

Matud pa ni P02 Perez nga nag-inom ang duha sa usa ka tindahan sa maong dapit ug kalit lang nagkalalis.

Ang biktima nga nahiagi sa maong dapit maoy miduol sa duha ug mibadlong sa duha nga naglalis.

Si Laurente ug Soronio nga kalit lang nasuko nagtinabangay sa pagkulata sa biktima kinsa wala matagbaw ilang giyayongan ang biktima ug gihagbong sa taytayan.

Nadailos sa pagkahagbong ang biktima ug mitugpa kini sa tubigang bahin sa taytayan nga nagdugtong sa lungsod sa Cordova ug Lapulapu.

Ang mga sakop sa SWAT nga maoy nakadawat sa maong alarma misikop sa duha ka suspetsado kinsa gitanggong karon sa bilanggoan.