ICT program sa CPPO ilusad

Moabot sa ikatulong semana dinhi sa Sugbu si PNP Chief Oscar Calderon nga maoy pinasidunggang dinapit alang sa pagahimuong ground breaking ceremony ug ang ilusad nga ICT program sa Cebu Provincial Police Office.

Kini ang nasayran sa Banat News kang kanhi Provincial Director sa CPPO Sr. Supt. Vicente Loot.

Matud ni Loot ang ground breaking anha ipahigayon sa luna sa Sudlon nga gipanag-iya sa probinsya nga may gilapdon nga 5,000 square meters diin tukuron ang bag-ong Provincial Command sa CPPO.

Ang maong proyekto gigahinan og P11.7 milyon sa Provincial Government ug P10 milyones ang gi-counter part sa Philippine National Police

Ang ICT program sa CPPO, online sa webcam ug 24 oras ang video sreening.

Matud ni Loot dili na makaligoy-ligoy ang mga polis nga tapulan ug mga badlungon kay mamonitor na man pinaagi niining bag-ong sistema nga iyang ipatuman.

Gibutyag ni Loot nga duna gyuy daghang polis sa CPPO ang labihang badlungona.

"Ang bantayan lang aning mga polis nga badlungon kaayo kadto ra gyud ilang inspector," matud niya.

Matud niya kinse ka adlaw una pa mapapas sa record sa computer ug di gyud kaipsot ang mga polis niini.

Dako hinuon ang pagsalig ni Loot nga padayonon sa iyang sumusunod nga si Sr. Supt Carmelo Valmoria kinsa maoy gitudlo nga modumala sa CPPO.