Alvin sayon rang tumbahon — Tommy

Gihulagway ni Mayor Tomas Osmeña nga mas sayon ra niyang pildehon kun si kanhi Mayor Alvin Garcia ang mo-atbang kaniya og balik sa eleksyon karong Mayo kun itandi ni kanhi Kongresista Jose "Dodong" Gullas.

Si Garcia maoy giplanohan ni kanhi Cebu City Sports Commissioner Jonathan "Atan" Guardo nga ikaduhang opsiyon nga ituboy pagka mayor atbang kang Osmeña kun mobalibad si Gullas nga molansar sa umaabot piniliay.

Nasayran nga si Gullas karon pang Febrero 14 ning bulana gitakdang mopagawas og desisyon kun mohinayon paglansar pagka mayor atbang kang Osmeña ug kun mahinayon sa maong laraw si Gullas ang anak ni Garcia nga si Raymund maoy giandam niya nga runningmate.

Apan matud ni Osmeña mas sayon ra niyang pildehon kun subling moatbang kaniya si Garcia tungod kay gawas nga duha ka higayon na niya kining gipilde mahulog usab nga usa ka pamantalaan ang mokontra kaniya sa umaabot eleksyon.

Nakaseguro si Osmeña nga kun si Garcia ang subling moparang kaniya ang mga kandidato niining kuhaon pagka-konsehal mao kadtong mga sobra na og wala dawata sa Bando Osmeña Pundok Kauswagan (BOPK).

Subling gipasabot sa mayor nga dili tinuod ang mga pamasangil sa oposisyon nga rubber stamp ang tanang konsehal karon sa konseho nga pulos sakop sa BOPK tungod kay kun tinuod pa ang maong pamasangil milampos na unta ang naputol nga negosasyon sa land swap deal tali sa luna sa probinsya ug siyudad sa Sugbo aron pagsalbar sa demolisyon sa kapin singko mil ka mga urban poor nga nagpuyo sa luna sa kapitolyo.