10 ka hapon nalanag sa pochero

Napulo ka mga turistang Hapon ang nangalanag sa ilang gikaon nga pochero sa usa ka restaurant, sa uptown area sa dakbayan sa Sugbo hinungdan sa ilang pagkalandig sa Chong Hua Hospital niadtong Miyerkules sa gabii.

Usa ka Dennis Chiong, ang tourist guide sa maong mga Hapon ang nipadangat sa reklamo sa rehiyonal nga buhatan sa Department of Health.

Sa interbyu sa DYHP, gikompirmar ni Dra. Susana Madarieta, regional director DOH-7, nga nakadawat siya sa reklamo gikan ni Chiong human sa maong insidenti.

Nunot niini, gimandoan dayun ni Madarieta ang Cebu City Health Department sa paghimo sa imbestigasyon.

Napakyas ang Banat News sa pagkuha sa pamahayag ni Chiong apan ang iyang inahan si Thelma Chiong ang nikompirmar sa maong insidenti.

Matud pa ni Thelma nga daw sa nataranta si Dennis human sa hitabo ug nangita kon asa siya modangop nga buhatan sa gobyerno.

Sumala pa ni Thelma nga iyang gitambagan si Dennis nga magpatabang sa Criminal Intelligence and Investigation Branch sa kapolisan sa dakbayan sa Sugbo ingon man sa National Bureau of Investigation.

Sa iyang bahin, ang hepe sa CIIB, Supt. Paul Labra II, sa interbyu sa DYHP niingon nga andam sila moimbestigar kon moduol kanila ang reklamante.

Apan ang tagdumala sa Kan-Irag Restaurant nihimakak sa taho.

Matud pa ni Merlie Melendez, supervisor for operations sa Kan-Irag Restaurant sa may dalan F. Ramos, dakbayan sa Sugbo, nga daghan ang nangaon niadtong higayuna ug gani 300 ka pochero ang na-order sa mga kustomers.

Sumala pa ni Melendez nga nagkuwang pa man gani ang ilang stock niadtong higayuna gumikan sa ka daghan sa ilang mga kustomer gikan sa alas 6 hangtud sa alas 11 sa gabii.

"Daghan man ang nangaon diri, nganong sila ra man," nagkanayun si Melendez.

Giklaro ni Melendez nga presko kanunay ang ilang karne samtang kon dili malikayan nga may dili mahalin, ila kining ipadala sa ilang mga tawo aron walay bahaw pagka-sunod adlaw.