Nursing gidunggab og icepick sa notadong tulisan

Gidunggab sa usa sa duha ka notadong tulisan gamit ang icepick ang usa ka tinun-an sa Nursing sa University of San Jose Recoletos human kini nagdumili paghatag sa iyang bag kagahapon sa buntag diha sa Sitio Mananga, Tabunok Talisay.

Apan, usa sa mga suspetsado napusilan sa mga polis nga mihimo og hot pursuit operation tungod kay misuway kini og sukol.

Nakaangkon og samad dinunggaban sa walang bahin sa iyang kilid si Maria Charina Estorba, 19, taga Barangay Tulay, Minglanilla, 3rd year college sa Nursing sa USJR kinsa daling gidala diha sa Talisay District Hospital sa drayber sa multicab nga iyang gisakyan.

Ang mga polis miila sa mga suspetsado nga si Alvin Timog ug Lito Oros, pulos nagpuyo diha sa lugar.

Si Supt. Romeo Perigo, hepe sa kapolisan sa Talisay, mibutyag sa Banat News nga si Timog ug Oros parehong mga notadong tulisan og sige na kining madakpan apan makabuhi usab dayon tungod kay dili man mopadayon og pasaka og reklamo ang mga biktima kung mabawi na ang ilang mga butang.

Matud ni Perigo nga posibleng si Timog ang midunggab ni Estorba.

Sila si PO3 Reynaldo Hoybia ug PO3 Arnold Damasco ug laing kauban nga mga polis migukod ni Timog ug Oros. Si Hoybia ug Damasco naaghat og pusil ni Timog tungod kay buot unta niining pusilon ang mga polis nga mosikop kanila.

Si Timog nalandig sa Vicente Sotto Memorial Medical Center apan si Oros padayon pa karong gipangita sa mga polis.

Si Perigo midugang nga ang mga tulisan kasagaran anha modagan sa Mananga tungod kay adunay mga residente diha sa lugar nga moapil og tago sa mga suspetsado.

Sa laing bahin, si Estorba sa pakighinabi sa Banat News kagahapon nagkanayon nga misakay siya sa multicab nga dunay rotang Naga-Basak gikan diha sa Barangay Punta Princesa paingon sa Minglanilla.

Duha ka lalaki kinsa usa niini nagsul-ob og kalo ug t-shirt puti ug ang usa nagsul-ob og t-shirt nga itom ang misakay usab sa iyang gisakyang PUJ diha sa Bulacao.

Ang nagsul-ob og kalo mitapad ni Estorba ug ang nagsul-ob og t-shirt nga itom nagpaatbang sa biktima.

Apan pila ka minuto mitapad usab ni Estorba ang nagsul-ob og t-shirt nga itom og gituktok niini ang PUJ aron mohunong diha dapit sa lugar nga nahitaboan ug miingon kini ngadto sa biktima nga "ambi ang imong cell phone kun dili ka gustong patyon nako."

Matud ni Estorba nga gibira sa nagkalo ang iyang bag ug mition kaniya og icepick ang kauban niini.

Nahitabo ang binirahay sa bag tali sa biktima ug suspetsado ug gigunitan usab ni Estorba ang icepick sa usa ka suspetsado nga gition kaniya.

Mikanaog gikan sa PUJ ang nagdala og icepick og milipot sa nahimutang ni Estorba dayon gidunggab niini ang biktima apan suwerte kay nakalikay kini hinungdan nga dili grabe ang samad nga naangkon ni Estorba.

Si Estorba midungag nga kalma kaayong naglakaw paingon diha sa ilawom sa tulay ang maong mga suspetsado human sa insidente. Apan wala madala iyang bag.