Mga polis sa Centro mironda way warrant

Usa ka polis sa Presinto 1 sa Centro Police Station gireklamo sa usa ka ginang sa panimalay gumikan sa pagsulod niini sa balay nga walay gikapakitang dokumento nga legal ang pagpangronda nga gihimo.

Ang gireklamo nga polis mao si P02 Raniel Cartin ug mga kaubang sakop sa Presinto 1 sa Centro Police Station ang mireklamo mao si Bonifacia Arellano, 56, minyo ug sa apo niini nga si Arnoldo Rocas, 18, ulitawo.

Sa ilang reklamo sa kapolisan sa Presinto 1, ilang gipadayag nga misaka ang mga polis sa ilang panimalay nga wala lang gani mopakita og search warrant.

Dugang pa ni Arellano nga gawas nga misulod sa ilang panimalay sila si PO2 Cartin, ang usa sa mga kuyog niining lalaki nanukmag pa sa apo sa biktima nga maoy nakaingon sa pagkabun-og niini.