Fire marshal hapit matabuni sa bongbong

Diriyot matabuni og nagdilaab nga bungbong si Cebu City Fire Marshal, Sr.Supt. Fredelson Codilla ug iyang aide nga si SFO4 Eddie Tabasa samtang nag-superbisar sa mga bombero kagahapon sa kaadlawon sa sunog sa Carbon Market.

Kini dihang ang atubangang bungbong sa mga edipisyong buyon sa Cebu Classic Guitar sa dalan Lincoln kalit nga mihagsa sa gibarugan sa duha.

Matud pang Codilla nga maayo nalang nakadungog siya sa usa sa mga bomberong diha sa usa ka firetruck pipila ka metros gikan sa ilang gibarugan nga nagpadulong nag kahagsa ang maong mga bungbong.

"Split second lang gyud gikan pagdagan namo diha pa nahagsa," asoy pang Codilla.

Dugang pang Codilla nga dali silang nakadagan palayo sa maong bungbong ug diha-diha mihagsa ang mga dagkong kahoy ug atop diha sa tunga-tunga sa kalsada nga mibabag na hinuon sa agianan.

Hinuon bisan gamay walay kadaut nga nahiaguman ang duha ug nakapadayon gihapon si Codilla sa iyang trabaho niadtong adlawa.