Dagkong pamilya sa Mandaue magsambunot

Dili lamang ang mga kandidato sa pagka-mayor sa dakbayan sa Mandaue ang magsambunot karong Mayo 14 eleksiyon kun dili lakip na usab ang mga kandidato alang sa pagka-bise mayor sanglit pulos kini lig-ong kandidato ug may mga kaugalingong tigpaluyo.

Sa kampo sa mga Ouano nga ang ikatulong sakop sa konseho nga si Konsehal Carlo Pontico Fortuna maoy ilang kandidato sa pagka bise mayor nga tandem ni Jovito "Jonkie" Ouano, si Konsehal Glenn Bercede nga tandem ni Konsehal Jonas Cortes ang pulos mga sakop usab sa dagkong pamilya sa dakbayan.

Si Cortes nga numero unong sakop sa konseho kinsa unang mideklarar sa iyang kandidatura alang sa pagka mayor sa dakbayan ang gisuportahan usab sa pipila ka mga barangay kapitan.

Samtang sila si Bise Mayor Amadeo Seno Jr ug kanhi Konsehal Magno Dionson kinsa mideklarar na sa ilang kandidatora alang sa pagka mayor ang gipaabot nga mopahibalo usab sa ilang tandem nga kandidato sa pagka bise mayor.

Si Seno sa iyang mga pamahayag ang miingon nga si Cortes ug Bercede mao unta ang iyang kandidato alang sa pagka bise mayor kon ang usa niini kanila ang nahinayon pa sa pag-tandem kang Jonkie.

Sa kasamtangan si Konsehal Elmer Cabahug mao karon ang gipaabot nga ika-tandem ni Seno sanglit lig-on usab kining kandidato nga ikasakbang nila ni Bercede ug Fortuna.

Si Cabahug sa iyang mga pamahayag mipadayag na usab nga bukas ang iyang kaugalingon alang sa iyang kandidatura sa pagka bise mayor sa dakbayan.

Sa laing bahin, si Dionson kinsa mideklarar sa iyang kandidatura alang sa pagka mayor ang nagpabilin pang bakante ang bise mayor niini.

Si Ariston Balodong Cortes nga igsuon ni Konsehal Jonas Cortes mao usab ang gipaabot nga ika-tandem ni Dionson sanglit lig-on usab nga kandidato alang sa maong katungdanan sanglit may kaugalingon kining mga tigpaluyo.