Residente sa Tinago moparang ni Tomas

Duna nay residente sa dakbayan nga nagtinguhang mokandidato pagka mayor atbang kang Mayor Tomas Osmeña sa Bando Osmeña Pundok Kauswagan (BOPK) ang nakaduso na sa iyang certificate of candidacy sa Commission on Elections Comelec alang sa eleksiyon karong bulan sa Mayo.

Usa ka Wendell Lope, 31, anyos molupyo sa dalan Zulueta, Tinago dinhi sa dakbayan sa Sugbo pormal nga misang-at sa iyang kandidatura pagka mayor sa buhatan sa Comelec niadtong alas 4 pasado sa milabay'ng hapon.

Si Lope nga nagpaila sa alyas nga Mr. President nangangkon nga peoples volunteer og independente nga molansar atbang kang mayor Osmeña.

Si Lope mao pa lay bugtong kandidato dinhi sa dakbayan sa Sugbo nga nakaduso sa iyang certificate of candidacy sukad gibuksan ang filing niadtong petsa 15 sa Enero.

Apan nasayran gikan kang Atty. Marchell Sarno, Election Officer for the North dihang nahinabi sa Banat News nga ilang nadiskobrihan nga dili rehistradong botante sa Tinago si Lope.

Apan bisan pa niini gipadayag ni Sarno nga ila gihapong gidawat ang certificfate of candidacy niini tungod kay obligasyon nila ang pagdawat niadtong si bisan kinsa nga politiko nga nagtinguhang mokandidato sa bisan unsang posisyon karong Mayo.

Matud ni Sarno ang ilang ulohang buhatan na sa Comelec maoy mohukom kun ikonsiderar ba nga "nuissance candidate" si Lope human unya nila iduso ang tanang lista sa mga kandidatu nga nakasang-at sa ilang certificate of candidacy human sa filing karong petsa 29 sa Marso.

Ang filing sa certificate of candidacy alang sa mga lokal nga kandidato nagsugod niadtong Enero 15 hangtod sa petsa 29 sa Marso ug samtang sa mga mokandidato pagka senador nagsugod sa Enero 15 ug mapupos sa Pebrero 12.