2 ka dalagita gi-rape, gi-molestiya sa Papa

Natingkagol karon sa prisohan sa Talisay Police Station ang usa ka 40-anyos nga amahan human kini pasanginling mimolestiya sa iyang duha ka anak nga babaye nga nagpanuigon og 12 ug 20-anyos.

Ang suspetsado nasikop sa mga polis sa milabay'ng adlaw diha sa iyang gitrabahoang establisamento sa Barangay San Roque.

Ang magsuong Marisa, 12, ug Julie, 20, (tinuod nga ngalan parehong gipugngan), taga dakbayan sa Talisay, mitaho diha sa kapolisan sa siyudad kabahin sa pag-unay og pagmolestiya kanila sa ilang amahan nailang si Jun, 40-anyos, kinsa nahimong biyudo sulod na sa tulo ka tuig.

Si SPO2 Raul Bacayo kinsa maoy miresponde sa insidente nagkanayon nga si Julie mibutyag nga nag-edad pa lang siya og 16-anyos dihang gisugdan siya sa paglugos sa iyang amahan apan gihilom lang niya ang gibuhat sa suspetsado ngadto kaniya tungod kay gihulga siya niini, hangtod nga nag-edad na lang siya og 20-anyos.

Niining bag-o lang gisunod sa pagmolestiya ni Jun si Marisa apan gibun-og sa suspetsado ang biktima tungod sa pagdumili niini sa gusto sa suspetsado.

Si Marisa misumbong sa ilang iyaan kabahin sa maong insidente hinungdan nga ang duha ka biktima gikuyogan sa ilang iyaan diha sa kapolisan sa Barangay Poblacion ug gitaho sa duha ang gibuhat sa ilang amahan ngadto kanila.

Si Jun sa pakighinabi kagahapon sa buntag sa Banat News hugtanon kaayong mihimakak sa mga pasangil sa iyang duha ka anak batok kaniya.

Apan giangkon ni Jun nga niadtong Oktubre sa milabay'ng tuig ug Enero 27 niining tuiga iyang giduwaan ang kinatawo ni Marisa ug hubog siya niadto dihang iya kining gibuhat.

Giangkon usab ni Jun nga tulo ka beses niyang gibuhat ang pagduwa-duwa sa kinatawo sa iyahang 12-anyos nga anak.

Si Jun gipasakaan na og kasong pagpanglugos ug child abuse diha sa Talisay City Prosecutor's Office.