Wagas magpapili na usab pagka-mayor

Laing kandidato sa pagka-mayor sa lungsod sa Compostela ang pormal nga mipadayag sa iyang tinguha sa pagpdagan sa umaabot nga eleksiyon.

Si Ritchie Wagas lumad nga taga Compostela mibutyag sa Banat News nga subli siyang magpapili sa pagka-mayor sa lungsod.

Matud ni Wagas nga adunay 52 ka tawo ang miduol kaniya kinsa mipadayag sa ilang tinguha nga moserbisyo isip konsehal sa lungsod apan iyaha una kining hashasan hangtud nga makapili siya og lig-ong ikaparang sa kandidato sa administrasyon.

Apan si Wagas nagdumili una sa pagbutyag sa kompletong line-up sa iyang mga kandidato tungod kay iya pang gisiguro si Kapitan Jury Quiño sa Basak kung modagan ba kini isip Bise-Mayor ubos sa iyang partido.

Si Wagas unang misulod sa politika niadtong tuig 2004 kinsa nagpapili kini isip mayor sa lungsod batok ni incumbent mayor Antonio Dangoy.