Kapitolyo mihatag og wheelchairs

Pito ka disabled ang gihatagan sa Kapitolyo kagahapon og tagsa-tagsa ka wheelchairs.

Ang pito dunay lainlaing balatian ug depekto sa panglawas hinungdan sa ilang pagkinahanglan sa maong kahimanan sa ilang paglihok ug pagpadayun sa ilang pangtungha.

Si Harvey Abinales, 11, taga barangay Lutac, Naga ug Hercy Sismar, 12, taga barangay Cogon, Naga ang parehong dunay polio.

Si Ethel Paran, 14, taga barangay Cantabaco, dakbayan sa Toledo ug Norma Fuentes, 14, ug Alemar Manreal, 10, pulos taga lungsod sa San Fernando ang parehong may cerebral palsy.

Si Randy Casereal, 28, taga barangay Capt. Claudio, dakbayan sa Toledo, ang dunay paralysis of lower extremities.

Samtang si Roderick Ruelo, 13, nga taga Tabunok, Tabuelan ang dunay congenital lower extremities.

Si Gob. Gwen Garcia ang nangunay pagtunol sa tagsa-tagsa ka wheelchair ngadto sa mga hingtungdan.

Gipahibawo ni Garcia nga ang naghatag sa mga wheelchairs mao ang The Church of Christ of the Latter Day Saints nga gipaagi sa Council for the Welfare of Disabled Person ug sa Provincial Social Welfare and Development Office.