Teddy O. mosuportang Nerissa karong Mayo

Mandaue City Mayor Thadeo Ouano andam nga mosuporta ni 6th District Cong. Nerissa Soon Ruiz sa iyang katapusang termino sa Kongreso atol sa umaabot nga piniliay.

Matod pa ni Ouano nga iyang suportahan si Ruiz apan kinahanglan pa kini nilang pormal nga sabutan ilabi na nga si DILG Undersecretary Lito Ruiz aduna pay problema sa mga Ouano.

Ang tanang kalambuan masayran unya kung moabot na sa dakbayan sa Mandaue si Kongresista Ruiz atol unya sa ilang panagtagbo.

Subay niini mipadayag si Ouano nga dili na siya modagan sa bisan unsang posisyon sa politika ug igo nalang siya nga mogiya ni Jonkie (iyang anak) kung ugaling palaran nga maoy mamahimong Mayor sa dakbayan sa Mandaue.

Gipahibalo usab ni Ouano nga posible si Konsehal Noel "Kiwi" Soon ang ilang suportahan sa pagdagan isip Provincial Board Member gumikan sa katakos niini sa natad sa ekonomiya sa dugang paglambo unya sa 6th district.

Samtang masaligon si Mayor Ouano sa iyang anak nga si Jonkie ug Fortuna nga mipasalig nga pagpadayon sa mga proyekto nga iyang nasugdan ilabi na sa mga establisimentong itukod sa Mandaue Reclamation area sa umaabot nga katuigan kung kini hatagan ug mandato sa katawhan sa dakbayan sa Mandaue sa human sa eleksiyon sa Mayo.