Duha ka military truck gidonar ni Gwen sa Centcom ug PRO-7

Ang kapitolyo mihatag ug duha ka military truck sa Regional Mobile Group ug 78th Infantry Battalion kagahapon sa buntag pinaagi sa usa ka turn-over ceremony nga gihimo didto sa Central Visayas Command parade ground.

Mismo si gobernador Gwendolyn Garcia ang mitunol sa yawe ug duha ka military truck kagahapon ngadto ni Heneral Cardoso Luna, PRO7 director Chief Supt. Silverio Alarcio Jr., Sr. Supt. Vicente Loot ug Sr. Supt. Jesus Gaquing.

Atol sa pakigpulong sa gobernador, iyang gisaysay kung unsa ka importante ang duha ka sa sakyanan sa mga sundalo ug kapolisan kay kini makadugang unya sa pagtubag sa tanang insurhensya nga gikinahanglan ug sakyanan labina kadtong sa layo nga dapit.

"Sukad pa kaniadto ako kanunay na gayod nagsuporta sa mga sundalo ug kapolisan and I for my part as governor believe that through continuing support against terrorism, fight against crime, ang atong probinsiya magpabilin gayod nga magmalinawon," matud pa ni Garcia.

Samtang sa habig ni Gaquing sa RMG ug ni Col. Jessie Alvarez sa 78th infantry battalion mapasalamaton usab sa kanunay nga suporta sa gobernador kanila ug sila nagmalaumon nga kini magpadayon kay pinaagi sa pagtinabangay sa probinsiya ug kapolisan ug mga sundalo masumpo gayod ang tanang kriminalidad ug terorismo sa Sugbu.

Tungod niining mao nga kalambuan malaumon usab si Gobernador Garcia nga unta magpadayon ang ila gayod nga kampanya batok sa total out war sa mga terorista nga diin maoy nakapahadlok sa mga bukirang bahin sa probinsiya sa Sugbu.