Tribu Basakanon ipadala sa Aliwan

Mopadala og contingent ang kagamhanan sa dakbayan sa Sugbu aron mosalmot sa tinuig nga kompetisyon sa Aliwan Festival didto sa kaulohan karong bulan sa Abril.

Ang Tribu Basakanon nga maoy kampyon sa Free Interpretation sa Sinulog Mardi gras niadtong nilabay'ng semana maoy magsilbing contingent sa dakbayan alang sa Aliwan festival.

Ang Tribu Basakanon mao usab kini ang defending champion sa Aliwan Festival niadtong niaging tuig ubos gihapon sa pag-abag sa suportang pinansiyal sa dakbayan.

Kagahapong adlawa pormal nga nakigtagbo ngadto kang Osmeña sila si kanhi konsehal George Rama, ang manager sa Tribu Basakanon ug ang choreographer niini og ilang gituki ang mga gikinahanglan sa gitakdang pagsalmot sa maong kompetisyon.

Si Osmeña nipadayag nga mohatag ang siyudad og tunga sa milyon ka pesos nga ayuda og posibli pang mopadala og duha ka bus aron magamit sa 200 ka mga dancers sa Tribu Basakanon kon kini kinahanglanon didto sa maong lugar.

Gipadayag sa mayor nga wala siya magkinahanglan nga mabalik ang napagawas nga pundo alang sa maong katuyoan tungod kay alang niya igo na kaayo nga makahatag og dungog ang Tribu Basakanon nga mag-representar sa siyudad sa Sugbu.

Giklaro sa mayor nga dili siya magduha-duha nga suportahan sa siyudad ang mga contingent dinhi sa dakbayan nga gustong mosalmot og mga kompetisyon sa lain-laing lugar basta iyang makita nga dunay kahigayunan nga makahatag og dungog sa dakbayan.