Priso sa BBRC, gipuspusan, giluba

Usa ka prisong "Payapa" sa Bagong Buhay Rehabilitation Center ang nalandig sa Cebu City Medical Center human kini gitabangan og puspos ug gidunggab sa laing mga priso.

Ang nalandig sa tambalanan giilang si Romulo Ligan, kinsa mga sinaligan sulod sa maong bilanggoan isip "Payapa" human kini dunggaba og icepick ug gitabangan og puspos sa ubang mga priso.

Gitumbok nga midunggab sa biktima mao si Joel Pagador, samtang ang mitabang og kulata og puspos mao sila si Junior Morales, Brian Quijo ug Joel Aranas ug uban pang wala mailhing mga priso.

Matud pang Sr.Inspector Gil Inopia, ang Operations Chief sa BBRC mitug-an sa Banat News nga si Ligan maoy nagbantay diha sa kusina dihang nagsugod na ang pagkuha sa rasyon nga pagkaon sa mga priso.

Usa ka Junrey Belandres kinsa usa sa mga milinya padulong sa kusina niadtong tungura gikatahong "misingit" sa linya hinungdan nga mireklamo ang ubang mga priso.

Si Ligan kinsa dunay tulo ka kasong robbery, nakabantay sa gihimo ni Belandres daling mibadlong kaniya apan gikatahong nasuko kini hinungdan nga gipuspusan ni Ligan sa iyang batuta ug miresulta sa panag-initay sa mga priso.

Ang mga priso mao ra gihapoy mihusay sa insidente ug nadesisyunan nga silutan si Ligan apan gikatahong di makadawat si Belandres sa silot nga gipahamtang kang Ligan tungod kay gaan ra kaayo hinungdan nga nagpalaban kini sa iyang mga kaubanan sa selda nga sila si Pagador.

Nianang pagkagabii, kalit lang nga gitabangan og kulata sa grupo ni Pagador si Ligan ug nadunggaban usab diha sa dughan si Ligan gamit ang usa ka icepick.

Si Ligan daling gidala sa CCMC tungod sa samad dinunggaban diha sa dughan ug dakong gisi sa ulo, samtang ang mga suspek gisulod na sa bartolina. Matud pang Inopia miangkon ang upat nga maoy mitabang og dagmal kang Ligan apan si Pagador miinsister nga igo lang mibarog nga look-out ang tulo niya ka kauban.

Kagahapon nakabalik na si Ligan sa BBRC human sa pagpatambal.