P1M nadala, sikyu 'tipi sa 5 tulisan

Napatay ang usa ka gwardiya ug nadala usab ang gibana-banang P1 milyong salapi gikan sa usa ka bodegang distributor og mga produkto gipatay sa lima ka mga lalaking tulisan nagsuot og uniporme sa mga polis ug armado og mga pistola kagahapon sa kaadlawon diha sa Basak San Nicolas ning dakbayan.

Ang biktima kinsa gipusil duha ka higayon diha sa iyang ulo giilang si Edgardo Embolode,Sr.32, lumad nga taga Tamatas, San Fernando, sakop sa Centurion Security Agency ug magbalantay sa Dranix Distributors Inc.diha sa dalan N.Bacalso sa maong barangay.

Lima ka mga lalaking nagsuot og General Office Attire (GOA) sa PNP ug nagpailang mga sakop sa Supervisory Office for Security and Investigative Agency (SOCIA) aron mohimo og inspeksyon sa mga gwardiya ang gitumbok nga mipatay kang Embolode ug midagit sa gibana-banang P1 milyon nga halin.

Sa imbestigasyon sa Homicide Section, kasamtangang nagbantay si Embolode diha sa guardhouse sa bodega dihang kalit nga miabot ang mga suspek luwan sa usa ka kolor grey nga Light Ace van nga gisakyan sa mga suspek.

Sumala pa sa kaubang gwardiya ni Embolode nga si Edgardo Tabigui,32, lumad nga taga Ben Unido, Bohol ug kasamtangang nagpuyo sa Cogon-Pardo nakadungog siya og tingog sa pito gikan sa pwesto ni Embolode nga maoy senyas aron siya paduolon.

Si Embolode misinggit nga dunay mga taga Socia nga buot mo-inspeksyon hinungdan nga iya kining giduol apan nakugang nalang siya dihang kalit siyang gitiunan og armas sa mga suspek dayong tukmod kaniya sulod sa guardhouse ug mimando kaniya sa pagpiyong sa iyang mga mata.

Diha-diha nakadungog siya og duha ka buto sa armas dihang iyang gibuka ang iyang mata kalit siyang gipuspusan sa puloan sa kalibre 45 pistola sa usa sa mga suspek dayon gipugos siya dala sulod sa administration office gamit ang mga yawe sa guardhouse.

Patay diha-diha si Embolode tungod sa duha ka igo sa bala diha sa ulo.

Ang mga suspek gikatahong migapos kaniya gamit ang packaging tape ug gipasok siya sa maong buhatan ug nakita niyang nagdala og acytelene ang mga suspek ug giablihan ang vault diin gisulod ang kwartang halin sulod sa usa ka semana gikan sa probinsya.

Si Sr.Supt. Patrociño Comendador mitukod na og task force nga langkuban sa Theft and Robbery Section, Homicide Section, Vice Control Section ug Criminal Investigation and Intelligence Branch aron maoy motutok sa kaso.

Si Comendador nagkanayon nga dako ang posibilidad nga dili local boys ang mga suspek apan diha ra sa sulod sa maong kumpanya naggikan ang impormasyon.

"Dunay posibilidad nga di na siya local group pero ang impormasyon diha gyud gikan sa sulod,duna gyuy local contact nga knows about diha sa sulod especially sa flow sa kwarta, robbery gud as much as possible maglikay gyud na sila nga makapatay unless nalang kung nakaila nila o ba kaha nisukol," asoy pang Comendador.

Si Sr.Inspector Alexis Relado sa pakighinabi sa Banat News mitug-an nga ilang gisubay karon ang posibilidad nga inside job ang nahitabo tungod sa mga nakitang mga buslot sa sirkumstansya.

Una niini mao nga giunsa pagkahibalo sa mga suspek nga wala madeposito ang halin sa usa ka semana ngadto sa bangko niadtong Biyernes ang Dranix, giunsa pagkahibalong naay vault sa sulod sa administration office ug kung unsay paagi aron makasulod sanglit taas man og paril ug higpit ang gwardiya sa dili mga empleyadong buot mosulod.

Dako usab ang pagtuo ni Relado nga posibleng maong gipusil si Embolode tungod kay nakaila kini sa mga suspek apan dako ang tanghaga nganong gibuhi si Tabigui.

Sa pagkakaron si Tabigui giisip pa sa TRS nga "principal suspect by indispensable cooperation" ug gipailawom siya kagahapon sa paraffin test ug polygraph test kun lie detector test sa buhatan sa National Bureau of Investigation.

Si Inspector Mario Monilar, hepe sa Homicide Section nagkanayon nga gihimo ang maong mga eksaminasyon kang Tabigui tungod kay dunay mga dili pagkatukma sa iyang mga pamahayag.

Samtang si Comendador nagduda nga posibleng nagpa-polis polis ra ang mga suspek aron kasulod sa maong edipisyo gamit ang pangalan sa Socia(karon FESAGS).

"Logic lang gud,kung polis ka mag-uniform gyud ka? Dali ka ma-identify," asoy pang Comendador kinsa miingon nga ang estilo sa mga suspek susama sa nahitabo sa Quezon City niadtong Disyembre 25 diin ang Ever Gotesco Mall gitulis sa napulo ka mga lalaking nag-uniporme og polis.

Kagahapon sa hapon gihimo sa task force ang reenactment aron pagbasa sa nahitabo nianang gabhiuna aron paghatag og katin-awan sa kapolisan.

Si Relado nagkanayon nga ipatawag nila og apil ang mga incorporator sa maong kumpanya ug ubang mga kawani