Nagduwa'g shotgun nadakpan

Mag-atubang og kasong kalapasan sa Commission on Election (Comelec) gun ban ang usa ka guwardiya kinsa nagpakita sa gidala niyang shotgun nga walay gikapakitang dokumento sa kapolisan.

Si Bederic Ancajas, 31 anyos, minyo ug nadistino sa usa ka establisamento nga nahimutang sa ubos nga bahin sa 1st Mactan-Mandaue Bridge sa Pajo, dakbayan sa Lapulapu ang hubog nga nag-duty sa trabaho.

Si P02 Christian Perez sa pakighinabi sa Banat News nagkanayo nga nagsige og kasa sa shotgun si Ancajas ug namatikdan kini ni P03 Martin Fortuna nga nahaagi sa maong dapit kinsa dali sa pagduol ug pagbadlong unta niini.

Sa pakisusi ni P03 Fortuna sa gidala nga armas wala makapakita'g lisensiya niini si Ancajas hinungdan nga gidakop ug gipa-liquor test.

Ang kasong ilegal nga pagdala og armas nga walay lisensiya ug kalapasan sa Omnibus Comelec gun ban ang ilang ipasaka batok sa suspetsado kinsa nasuta nga hubog usab nga mitambong sa iyang trabaho.