United opposition vs. Ouano

Kampo ni Konsehal Jonas Cortes ug Magno Dionson posibleng mag-usa sa pakig-atbang sa mga kandidato ni Mandaue City Mayor Thadeo Ouano sa umaabot nga piniliay.

Ang maong kalamboan gipamahayag sa kampo ni Cortes sa pakighinabi sa Banat News kagahapon diin giingong ang ilang tinguha mao ra gyud ang pagpalambo sa dakbayan.

Ang kampo ni Jonas Cortes pinaagi sa iyang amahan nga si kanhi Bise Mayor Demetrio Cortes mihimo na karon ug mga lakang aron sabutan pakighiusa ngadto sa grupo ni Magno Dionson nga buot usab magpapili pagka mayor sa dakbayan sa Mandaue.

Nakita sa grupo ni Cortes nga dunay mga potensiyal nga mga political figure nga anaa sa grupo ni Dionson ug mismo si Magno adunay dakong ikatabang sa kalambuan sa dakbayan sa Mandaue.

Buot usab sa mga Cortes ang pakigsabot sabot sa grupo ni Ading Seno nga mipahibalo na usab nga mopapili pagka mayor aron maumol ang usa ka united opposition kun ugaling dili ang grupo nila ni Konsehal Jonas Cortes ug Konsehal Glen Bercede ang mamahimong standard bearer sa partidong LAKAS.

Hinuon hangtud ning pagbalita padayon pa ang negosasyon sa duha ka grupo alang sa panaghiusa sa tanang mga grupo nga buot moatbang sa mga kandidato ni Mayor Teddy Ouano.