Obligasyon sa buhis pabayran na sa CH

Ang mga tag-iya og kayutaan ug building dinhi sa dakbayan nga wala na magbayad og buhis giawhag pagbayad na sa ilang obligasyon aron dili mabaligya ang ilang katigayonan sa subasta.

Mao kini ang awhag ni city treasurer Tessie Camarillo nga mipahibalo nga ipahigayon nila karong Enero 31 ang pagsubasta sa katigayonan sa 185 ka delinquent taxpayers.

Matud ni Camarillo nga duna pay higayon ang maong mga tag-iya og real properties - sama sa kayutaan ug mga building - nga maka-settle sa ilang obligasyon nga taud-taud nilang wala tagda.

Nabantayan nga dunay duha ka tag-iya og real properties nga ang bayranan nga buhis subra sa usa ka milyon ka pesos.

Ubos sa balaod, ang mga local government units gitugotan nga makasubasta sa kabtangan sa mga tawo nga wala magtagad pagbayad og buhis sa ilang pamatigayon.

Gitataw ni Camarillo nga ang kantidad sa ilang pagsubasta katumbas ra sa wala kabayri nga buhis sa mga tag-iya sa maong patigayon.