Polis sa CCPO gireklamong nanio'g armas

Usa ka polis nga nadestino sa Cebu City Police Office ang gipasanginlang nanion sa iyang kalibre .45 nga service firearm ngadto sa kaduwa og basketball sa iyang pag-umangkon kagahapon sa buntag diha sa basketball court sa Sari Ville subdivision Barangay Poblacion, dakbayan sa Talisay.

Si Jonathan Lim, 34, residente sa nahisgutang lugar mipasangil nga gitionan siya og pusil ni PO1 Renel Chavez, 34, taga Barangay Dumlog sa maong siyudad ug nadestino diha sa CCPO.

Base sa imbestigasyon sa kapolisan sa siyudad nga si Chavez nagtan-aw dihang nagduwa ang iyang pag-umangkon nga si Pablito Anthoy Villaver ug si Lim.

Gikatahong rubo kaayo ang duwa sa grupo ni Lim ug Villaver hinungdan nga mibadlong si Chavez.

Apan matud ni Lim nga gitionan siya og pusil ni Chavez ug giingnan siya niini nga "ayaw'g isog-isog diha".

Ug sa maong insidente nahunong ang duwa tungod kay nangahadlok ang mga magduduwa.

Apan gihimakak ni Chavez sa pakighinabi sa Banat News ang nahisgutang pasangil batok kaniya.

Mibutyag kini nga gihapak ni Lim sa ulo si Villaver, gisiko usab ni Lim ang usa ka kauban sa iyang pag-umangkon ug sumbagon pa gyud unta ni Lim ang laing kauban ni Villaver hinungdan nga miduol siya ug mibadlong sa maong player.

Si Chavez mipasangil ngadto ni Lim nga arogante kaayong nangutana ngadto kaniya kung kinsa siya hinungdan nga nagpaila siya nga usa ka polis.

Human sa maong hitabo mipaingon ngadto nila ni Chavez ang mga kauban ni Lim ug pulos kini nagbitbit og mga bato hinungdan nga nanagan sila paingon sa ilang multicab nga sakyanan.

Giangkon ni Chavez nga nagdala siya sa iyang service firearm apan iya kining gibilin diha sa iyang sakyanan samtang diha sila sa basketball court.

Si Chavez midugang nga nagpatawag na siya og polis tungod kay gisirad-an sa grupo ni Lim ang gate sa subdivision ug gibangilan og bato ang ligid sa iyang sakyanan nga sa iyang pagtan-aw dili gyud sila pagawson sa lugar.