Didi Gullas suportahan ni Soc

Wa matandog si Mayor Socrates Fernandez sa Talisay City sa gipalakaw nga estorya nga si Gerald Anthony "Didi" Gullas anak ni Kongresista Eduardo "Eddiegul Gullas" maoy mokandidato pagkamayor sa Talisay karong Mayo.

Matud pa ni Fernandez nga ang katapusan niyang nadunggan kang Congressman Gullas mao nga siya ug si Vice Mayor Aberdovey mao gihapoy parison sa pagka-mayor ug pagkabise mayor sa umaabot nga election.

Human molutaw ang mga balita nga desidido ang kaubang miyembro sa administrasyon sa Talisay nga si Didi maoy padaganon pagka-mayor, si Fernandez nagkanayon nga wala siya'y supak niini ug andam siya sa pagtunol sa iyang suporta kang Didi.

Kini tungod kay matud pa ni Fernandez dili siya maoy mohukom kun dili si Congressman Gullas, ang silbi nilang amahan sa ilang partido.

Gani midugang si Fernandez nga bisan si konsehal Gabriel Leyson kinsa miplastar na sa iyang line-up alang sa election sa Mayo, gihangop gihapon niya ang maong kaugmaran kay alang kaniya mga Talisaynon may mohukom ug dili siya.

Gidayeg usab niya si Leyson nga takus gihapon sa maong katungdanan tungod kay dako usab kinig nahimo sa Talisay ilabi na sa mga kayutaan niining gipuy-an sa mga Talisaynon.

Busa alang kang Fernandez paabuton niyang makigtagbo sa partido si Congressman Gullas aron makahimo dayon silag konkretong lakang sa pagpangandam sa ilang himuon karong umaabot nga election.

Alang kang Fernandez, bisan kinsa nga kahukman sa grupo nga ituboy pagkamayor sa Talisay andam siya sa pagsuporta niini, kay nakaserbisyo naman usab siya sa mga Talisaynon isip mayor, ug nakita na usab ang mga mehoras sa dakbayan pinaagi sa iyang pagkamayor.